أولاً... وللأمانة هذه الأمثال منقولة من برنامج الكلام الزين للأستاذ الفاضل ( الهادي محمد حقيق) الذي كان يذاع منذ سنوات مضت بإذاعة طرابلس المحلية .
* يا سعد من قال أمي .. وقالت نعم وجاوباته .. تاريتها الأم جنة .. ياتعس من فارقاته .
* كل حد وسعده .. حتى البرم ، وحدة تطبخ في السفناري ، وحدة تطبخ في اللحم .
* مدام ولدي حي يا سعدودي .. نوار قبرعون فوق خدودي .
* الشوارب تبوس .. والقلب فيه السوس .
* الفار الزرباز من سعد القطوس .
* اللي واخذ على طعامك ، وين يشبحك يجوع .
* صامت قليل الملح ما يتعدّى .. برّك احدانا ناقته وتغذّى .
* ما يحبّها شبح .... جابوهلّه عروس .
* في اللبس زوجة من ... وفي الشرف بنت من .
* كل شئ دواه الصبر ، إلا قلّت الصبر ماليهاش دواء .
* اللي ضرباته أمه راحت فيه .
* مشيت للبحر نشكي من كبر هبالي .. حتى البحر وخّر ووجعه حالي .
* غايضه واسمع مافي قلبه .
* كل شئ تلقاه في السوق ، كان أمك وبوك .
* اللي يحب روحه ، يقعد بروحه .
* شرْقه بريقك ، توّريك عدوّك من صديقك
قرد موالف ولا غزال شارد .
* يا تعس من عنده ابنتّه حارة ... بنيّة وحيدة تفيّض المرارة .
* يا عيون مصبركم على غاليكم ... كيف ترقدوا نوم الهني ويجيكم .
* تمنيتلك يا قلب ما تتمنى ، حجة وتوبة والصلاة والجنة .
* يا نفس توبي وارجعي للمولى ... راهو وراك القبر مشنى طوله ...
لو تندري يا نفس شن يطرالك ... تنوحي على روحك العمر بطوله .
* اللي ما تعرفش تندب ، علاش يموت راجلها .
* حاسدين الأعمى على طول عكازه .
* قالّه التقعميز على الرخام في الصيف مضرة ..
قالّه وفي الشتي ؟ ... قالّه لو كان خلاك تقعمز .
* إمشي صحيح لا تعتر لا اطيح .
* اللي مرته قصيرة ، يفرح ويقول صغيرة .
* ياعين خليك منه كثر البكي والغريدي ، إمغير أطلبي فضل مولاك ، يقرب زول من تريدي .
* بالله يا قلبي شرتعها ... يا رحمة ربي موسعها .
* فيه من كلامه مستكه وقرنفل ، وفيه من كلامه حار زي الفلفل .
* قال للقبر ردلي بوي ... قالّه أنا نستنى فيك .
* زوجت بنتي باش نرتاح من بلاها ، جتني وأربعة صغار وراها .
* حط الفلوس في فم المدفع يسكت .
* الكذاب .. أصبر شوية وانشده .
* زي رجل البهيم القدامية ... لا تحك ، لا تصك .
* اشكون يسبقك ، إذا تجري وحدك .
* ما يغلبك كان اللي يقولك أعطيني فلوسي . وإلى اللقاء في مرة قادمة ،،،،،،،،
* نضحك ونلعب غير شهلولية ... وضرب المعاني ما يفوت عليّا .
* دير المليحة يا ولد وأنساها ... كان عشت على طول الزمان تلقاها .
* لو كان نشكي للنجوم يغيبوا ، البحار تـنزح والصغار يشيبوا .
* والله يا قِـلـّة طويسة مُـرّة .. تقلّـع غشاش القلب يطلع برّة .
* دخانك عماني ... وطبيخك ما جاني .
* ريت بنت في غريان يا مجملها ، نعطي حياتي كان قبلوا هلها .
* اللي عضّك ...وقّضّـك في سنونك .
* شعيرك ولا قمح الناس .
* ذِل قرشك ، ولا ذِل نفسك .
* تحزمت بيكم درتكم في عوني ... نحساب حملي خفّ ... ثقلّـتونــي .
* تحطّه في القرعة ، تلقاه في البيدنجان .
* يسمع ما يكره ... ويدير ما يبّـي .
* كيف اللي يخرّف في حلمته لحماره .
* شاقي ولا محتاج .
* جبال الكُحل ... يكملوهم المراود .
* دزّوه يخطب ، تعّرس ودار صغار .
* الودن تسمع والعقول توازن ... والعين تشبح والقلوب مخازن .
* الصبر لله والرجاء في المولى ، مع الصبر ماعندي كلام انقوله .
* يا ريتني نمشي للصفا والمروى ... نشرب من زمزم لين قلبي يروى .
* عدّينا البحر ، يا بال البحيرة .
* اللي طلب يُطلب الله هو كريم المعاطي ، والعبد شنو قدره لا يشيّعـك لا يواطي .
* أنا بوي لَجـيـت نبكي وقال خيرها وانشدوها ، وقولولها علاش تبكي ، أنا حي مازلت بوها .
* الزين ديمه زين ما يتوارى ... والعِـفـن في الشـدّة تبـان عـواره .
* الفـم الساكـت ، ما يـنكـتـبـوش عليه السـوايا .
* واحد فراقـه مُـرّ شيـح وجَعّــَدة ... وواحد إذا فـارق إنديروا وَعْده .
* يسلّم عليك العقل سلامين والثالث يجـيء من حداكم ... لا نريد مال ، لا نريد زرع ، أنا نريد غير نقعد حداكم .
* سلّـم وليـدي قال شنهـو تـبي ، مدام راسي حـي ما تـنْـكبّي .
* واحد يحلّـك من قفال حديدك ، واحد على هـمّ الزمـان يزيـدك .
* دمعات نزلوا من العيــون سخـونه ، الخـد إنكْـوى منهـم تـغـيّـر لونـه .
* بعدي ودونـي يا بنات الدّالة ... ومهبول من يِـمّـن للرجـالة .
* يا طير بجناحات بَـرّة بـَرّة .. سلّم على وليـدي اطناش المـرّة .
* الشـين ما باش القلب إيرومه ... والزين دارولي عليه خصــومـه .
* خيار الـتّـبّـع في ولد دمّـه وافي ، يعطيـك صبّاطـه ويمشـي حافـي .
نلتـــقي قريـــباً لو كان مازال لينا عمر .....................
الحال مستمـــر مع برنامج الكـــلام الزين وما نقلت عنه من أمثال شعبية ..........
* يا قلب عندي حباب ما تنساهـــم ... صون ودّهــم واحفــظ عزيـز غـلاهم .
* إن شاء الله يا وليدي إدّيـر فرح والعيــن حـيّــة ، زكّــار من الصــبح لـلـيـل ، وبـارود كـيف الـقلـيّــة .
* واحد توكـل على الله ، وواحد وكيلـه دراعـه ، واللي توكل على الله شـري العـز والذِل بـاعـه .
* بـيعاونـوه على قبـر بـوه ، طبّـوا الفاس وخـللّوه .
* العـين فـي غـيـاب عـزيـز .. الساعـة بعامـين عنــدهم .
* القيـاس مِـيّـة ... والقـص مـرّة .
* ساعات يـزهى خاطـري وعيـوني ، وساعات يا نفسـي عليّا تهونـي ، ساعـات نبـدى زاهـي ، وساعات نبـدى في غشاشـي لاهـي ،
ساعات حتى الشيـن عندي باهـي ، وساعات حتى الزيـن يـبـدى دونــي .
* وحـدة قالت : الـبَرّ ما نسكنـاش ، والبحر فيـه النصارى ، والـكِـتّان ما نـلبـساش ، والمـال فـيه الخسارة ، وقـوي السَـمن ما ناكلاش ،
والـزيت فيه المرارة ، والشـين ما ناخداش ، والـزيـن فيه الـوعـارة ...... قولولـي شنــو الدبــارة .
* واحـد كـلامـه عسـل في صونيـة ، وواحـد كلامـه مـوت تُخـنـق فـيّا ، وواحد كلامـه عسل في قيشاني ، وواحد كلامـه غير ضرب معاني .
* اللّــي مـش واخـدة عالبخـــور ، ويـن بـخّـرت حُرقـت رداهـا .
وإلى اللقــاء ، إذا كان في العمر مازال بقية .................