قصقصة على اصولها

شن حالك ؟ وشن اخبارك ؟ وشن امورك ؟

امتى تنوض الصبح ؟

امتى ترقد فى الليل ؟ ومن ترقد معاش اتنوض والا اتنوض مرة مرة مخلوع من الكوابيس ؟

هل انت عصبى او هادىء لين خلاص ؟

عندك اخوة والا وحدانى ؟ وقداش خو واخت عندك ؟


هل انت من الاشخاص اللى لما يتعفلق ايكسر اللى قدامه والا اللى يغمض عيونة ويلبلب ؟

قداش معاشك ؟ تصرف فيه والا اتدس فيه لعمرك التانى ؟

كم ساعة اتخش للنت فى اليوم ؟

انت من النوع الزكومى قصدى مُراض ومن عيادة لعيادة وتثاتر حتى من المكيف والا اصحيح وتمشى امورك بالليم القارص ؟

تحب البحر؟ امشيت للبحر السنة اهيا ؟ كان ايه احكيلنا لو صار معاك موقف فى البحر؟

تقرا فى الجامع والا لا ؟ وكان تقرا لى وين واصل فى القراّن ؟

امخصص وقت فى رمضان لقراءة القرأن والا بالصدفة كان افضيت ؟

تتفرج عالتلفزيون؟ وعلى شنو ؟


==========

شن رايك فى بلادك ؟

تتمنى تسافر من بلادك ومعاش ترجع والا وطننا ياوطننا ؟

بكلمة او اتنين شن تقول للمسئولين على صيانة الطرق ؟

شن رايك فى الطب فى ليبيا ؟

شن رايك فى التعليم فى ليبيا ؟ وانت مع او ضد القوانين الجديدة اللى حطوها فى التعليم ومنها :اللى يعاود اكتر من تلاتة مرات ايلزوه و اللى ايجيب اكتر من تلاتة مواد مافيش دور تانى ؟

هل انت من عشاق الرياضة ؟ وماهو الفريق اللى تشجع فيه ؟

ترا قوللنا اغنية ولا بيت شعر ولا اى شى تشجيعا لفريقك ؟

هل فيه شى يتميز بيه الليبى عن غيره ؟ ولو فيه شن هو ؟

كم شفرة عندك ؟وشن رايك فى انتشارهم قصدى لو عندك شى فى خاطرك بتقوله على النقالات والشفرات والجو اهوا احكى فى سطرين بشكل عام وخاص ؟

عندك واصطات والا لين تتدهش باش توصل للى تبيه ؟؟ وكان عندك هل انت من النوع اللى إتمشى فى امورك ديمة بالواصطات ؟

==========
اتعيش حاليا فى قصة حب ولا عشتها وتمت ؟

كم مرة حبيت ؟ وهل انت مع الحب الاول لايتبدل لا يتحول والا الحب الاول يتبدل ويتحول ؟

شن الشى اللى يجذبك للطرف التانى (شكله او شخصيته والا فلوسه )؟

لو حبيت شخص هل تسامحه على اى شى حتى لو كان على حساب كرامتك ؟

فى نظرك شن هو الشى الذى لايغتفر من الحبيب ؟

شن ردة فعلك لو خانك حبيبك ؟

شن تقول للى تحبه بكلمة او اتنين وكان مايسدكمش حتى سطر ؟

=========

تهتم لرأى الاخرين ؟

من يتطفل على شئون الآخرين فاضى وماعنده مايشغله .. هات تعريف تانى من عندك عالشخص المتطفل؟

لو شخص اخداها فى جرتك ويدوى عليك وانت مابينك وبينه شى ولا تعرف السبب اللى يخليه هكى يتصرف كيف تتصرف معاه ؟ اتدوره والا اتخليه يدوى وتدعيله ربى يهديه ؟

شخص اكذب عليك مرة مازال تعطيه ثقة وتصاحبه من جديد ؟






شوره كترت الاسئلة يعطينى اللى فى بالى وخلاص
وكل سنة وانتم طيبين